Pas deklaratës së fundit të Ministrit të Brendshëm teknik, Dritan Demiraj dhe Kryeministrit Edi Rama se kanë 124 emrat e implikuar në trafikun e kanabisit në vend, ka reaguar zëvendëskryetari i Lëvizjes Socialiste për Integrim, Luan Rama.
Ai ka kërkuar që numri një i Qeverisë dhe Ministri i Punëve të Brendshme Dritan Demiraj, të ndjekin të gjithë hapat ligjorë, për 124 emrat e të përfshirëve në veprimtari kriminale të kultivimit të drogës, që thanë se disponojnë.
Përmes një postimi në rrjetin social “Facebook”, Luan Rama shkruan se Prokuroria, nëse nuk e ka bërë, duhet të nisë menjëherë procedurat që ligji e detyron, për hetimin dhe fillimin e çështjes penale për emrat e listës që disponon Kryeministri dhe Ministri i Brendshëm!”
Ja statusi i plotë
Kryeministri e më pas edhe Ministri i Brendshëm, deklaruan se disponojnë një listë me 124 emra të implikuarish në veprimtarinë kriminale të kultivimit e trafikimit të drogës në Shqipëri!
Kaq nuk mjafton!
Si funksionarë të lartë të shtetit ata duhet ta dinë se e kanë për detyrë të veprojnë në zbatim të ligjit duke kryer si hap të parë dërgimin e listës së emrave dhe të të gjithë të dhënave që kanë në Prokurori!
Ndërkaq, Prokuroria, nëse nuk e ka bërë, duhet të nisë menjëherë procedurat që ligji e detyron, për hetimin dhe fillimin e çeshtjes penale për emrat e listës që disponon Kryeministri dhe Ministri i Brendshëm!
Shteti ka ligje dhe funksionon përmes zbatimit të ligjit!
GSH.al